బాలీవుడ్ తెరపై 'డ్రీమ్ గర్ల్'గా కోట్లాదిమంది గుండెల్లో స్థానం సంపాదించుకున్న సీనియర్ నటి, భారతీయ జనతా పార్టీ నాయకురాలు హేమామాలిని రాజకీయ ప్రస్థానం వెనుక ఎవరికీ తెలియని ఎన్నో ఆసక్తికరమైన నిజాలు ఉన్నాయి. ప్రస్తుతం ఉత్తర ప్రదేశ్‌లోని మథుర నియోజకవర్గం నుంచి వరుసగా 12 ఏళ్లుగా పార్లమెంట్ సభ్యురాలిగా ప్రాతినిధ్యం వహిస్తున్న ఈమె, రాజకీయాల్లోకి అడుగుపెట్టడం వెనుక తన భర్త, దివంగత ప్రముఖ నటుడు ధర్మేంద్ర తీవ్ర వ్యతిరేకత వ్యక్తం చేశారని ఇటీవల వెల్లడించారు. ధర్మేంద్ర స్వయంగా 2004 నుంచి 2009 వరకు రాజస్థాన్‌లోని బికనీర్ నియోజకవర్గం నుంచి ఎంపీగా పనిచేసిన అనుభవంతో, రాజకీయాల్లో ఉండే ఒత్తిళ్లు, భద్రతా సమస్యల గురించి బాగా ఎరిగి ఉన్నారు. అందుకే హేమామాలిని రాజకీయాల్లోకి వస్తానన్నప్పుడు ఆయన తీవ్ర ఆందోళన చెందేవారు. దేశవ్యాప్తంగా ఎన్నికల ప్రచారానికి వెళ్లినప్పుడు దాదాపు 5,000 నుంచి 6,000 మందికి పైగా వచ్చే భారీ జనసందోహాన్ని, తరచూ చేసే హెలికాప్టర్ ప్రయాణాలను చూసి ధర్మేంద్ర భయపడేవారట. 'ఇంత జనం మధ్యలోకి వెళ్లడం నీకు సురక్షితమేనా? అసలు ఈ ప్రచారాలు, రాజకీయాలు చేయడం నీకు నిజంగా అవసరమా?' అంటూ ఆమెను పదే పదే ప్రశ్నించేవారని హేమామాలిని గుర్తుచేసుకున్నారు.

అయితే, ఆమె రాజకీయ జీవితానికి అసలైన పునాది 1999 లోక్‌సభ ఎన్నికల సమయంలో పడింది. ప్రముఖ నటుడు వినోద్ ఖన్నా గురుదాస్‌పూర్ నియోజకవర్గం నుంచి పోటీ చేసినప్పుడు, ఆయన తరఫున ప్రచారం చేసేందుకు హేమామాలిని మొదటిసారిగా వేదికపైకి వచ్చారు. అంతమంది జనం తనను చూడటానికి రావడం చూసి ఆమె ఆశ్చర్యపోవడమే కాకుండా, ప్రజల్లో తనకున్న ప్రజాదరణను ప్రత్యక్షంగా గుర్తించారు. మొదట్లో వేదికలపై రాజకీయ ఉపన్యాసాలు ఇవ్వడానికి భయపడిన హేమామాలినికి, వినోద్ ఖన్నా ఎంతో ధైర్యాన్ని నూరిపోసి ప్రసంగాలు ఎలా ఇవ్వాలో నేర్పించారు. విశేషమేమిటంటే, గురుదాస్‌పూర్ సభ కోసం ఆమె హిందీలో మాట్లాడిన మొదటి రాజకీయ ప్రసంగాన్ని స్వయంగా ఆమే తయారు చేసుకున్నారట.

ఆరంభంలో రాజకీయాల్లోకి రావడానికి హేమామాలిని పూర్తిగా నిరాకరించినప్పటికీ, ఆమె తల్లి ఇచ్చిన ఒక మాట ఆమె ఆలోచనా విధానాన్ని మార్చేసింది. 'అటల్ బిహారీ వాజ్‌పేయి, ఎల్.కె. అద్వానీ వంటి దిగ్గజ నాయకులు ఉన్న బీజేపీ ఒక మంచి పార్టీ. ఇన్ని సంవత్సరాలుగా సినిమాల ద్వారా ప్రజలకు వినోదాన్ని పంచావు, ఇప్పుడు లభించిన ఈ అవకాశంతో దేశానికి, ప్రజలకు సేవ చేయి' అని తల్లి ప్రోత్సహించడంతో ఆమె రాజకీయాల్లోకి రావాలని నిర్ణయించుకున్నారు. అయితే, పార్టీలో చేరే ముందే హేమామాలిని బీజేపీ అధిష్టానానికి ఒక ముఖ్యమైన షరతు విధించారు. తాను కృష్ణ భక్తురాలినని, ఒకవేళ ప్రత్యక్ష ఎన్నికల్లో పోటీ చేస్తే కేవలం శ్రీకృష్ణుడి జన్మస్థలమైన మథుర నియోజకవర్గం నుంచే పోటీ చేస్తానని స్పష్టం చేశారు. ఆమె షరతుకు సుష్మా స్వరాజ్, అరుణ్ జైట్లీ వంటి సీనియర్ నాయకులు పూర్తి మద్దతు తెలిపారు.

అలా 2014 లోక్‌సభ ఎన్నికల్లో మథుర నుంచి పోటీ చేసి ఘనవిజయం సాధించిన హేమామాలిని, ఆ తర్వాత 2019,  2024 ఎన్నికల్లో కూడా వరుసగా విజయం సాధించి హ్యాట్రిక్ కొట్టారు. గత 12 సంవత్సరాలుగా మథుర ప్రజల అభిమాన ఎంపీగా సేవలు అందిస్తూ, ఒకవైపు భర్త ఆందోళనలను, మరోవైపు రాజకీయ సవాళ్లను సమర్థవంతంగా ఎదుర్కొని విజయవంతమైన మహిళా నాయకురాలిగా నిలిచారు.

Hema Malini, Dharmendra, Hema Malini Politics, Mathura MP, BJP Hema Malini, Vinod Khanna